shosho
المساهمات : 67
تاريخ التسجيل : 15/09/2008
 |  موضوع: *-*-*أنتى تلفى تلفى وتيجى بعد الساعة ستة*-*-*  الأربعاء سبتمبر 17, 2008 8:33 pm | |
| واحد ظلنطحى محلتوش حاجة ابدا لا لاقى ياكل ولا لاقى يشرب . هدومة مقطعه وحالته كرب يعنى . قال لنفسه يا واد تعمل ايه علشان تستريح من الذل ده . احسن حاجة تروح تنتحر وتنهى قصتك الطويلة دى .
قرر انه ساعة الغروب يروح يرمى نفسه فى البحر وينتحر ويموت وخلاص . وجه الغروب وراح صاحبنا وهو ماشى على الكورنيش بيتحسر على حياته اللى انقضت كلها زل وتعب قام لقى باب كبير قوى زى ما يكون باب لمدينة ولقى كمان (6) انفار قاعدين جنب الباب حوالين طرابيزة كبيرة بس شاف حاجة غريبة . شاف ان كل واحد فى الستة دول بيقوم يلف لفة حوالين الطرابيزة دى ويقول الحق عليا ويروح يقعد فى مكانة .
المهم صاحبنا استغرب الموضوع ده قوى لكن وفى اثناء ما هو بيتفرج عليهم لقى باب المدينة اتفتح وخرج منه ناس محمله اكل كتير قوى وحطوه على الطرابيزة ورجعوا دخلوا تانى وقفلوا الباب المهم قرب صاحبنا لقى الاكل كتير قوى يكفى الناس اللى قاعده دى وزيادة ولقى ان الست انفار دول كل واحد بيلف لفه وياكل لقمة ويقول الحق عليا ويقعد فى مكانة . فقال الظاهر ان العيال دى شغلتها الحق عليا انا هقعد اكل معاهم واقول الحق عليا انا مش عاوز حاجة اكتر من كده .. مساء الخير محدش رد عليه طبعا لانهم مشغولين بالحق عليا .. المهم فسح ياد انت وهو وقعد . بقيت ييجى عليه الدور يقوم يلف لفة وياكل لقمة ويقول الحق عليا وتلف تانى وهكذا .
اثناء ما هو مشارك الناس دى فى الحق عليا دخل عليهم راجل طويل وعريض وشكله عظيم كده بينادوله ابونا . فجه عنده وقاله انت قاعد بتعمل ايه هنا . قاله انا معملتش حاجة ابدا انا كنت جعان ولقيت الناس دى بتقول الحق عليا وبتاكل قلتلهم مساء الخير محدش رد عليا فقلت اقعد واكل معاهم واقول الحق عليا . قاله لا لا لا يابنى وتقول الحق عليا ليه طالما معملتش حاجة غلط تعالى معايا مسكه من ايده ودخل بيه من باب المدينة وقاله البلد دى بتاعتى . تاكل وتقول على حساب ابونا وتعمل اللى انت عاوزة وتقول على حساب ابونا . فصاحبنا قاله ازاى ؟ رد عليه ابونا يعنى تجيب اللى انت عاوزة ولما تيجى ساعة الحساب تقول على حساب ابونا .. فرد صاحبنا طيب وان ضربونى ؟؟ فقاله ابونا لو ضربوك تعالى عند الباب تانى هو انت يعنى هيجرالك حاجة ؟؟
المهم صاحبنا نصه عاقل ونصه مجنون قال طيب نجرب . دخل على قهوة سقف .. مين ايوة .. قاله عاوز واحد شاى لكن تصلحة شاى مظبوط .. جه الشاى شرب الراجل واتمزج وجات ساعة الحساب . الحساب كام .. الحساب كذا .. على حساب ابونا .. تحت امرك يا افندم .. فصاحبنا قال ده الظاهر الحكاية بجد .. فقام سال الجرسون مفيش مطعم هنا بس يكون نضيف كده ؟؟ فقاله فيه يا سعادة البيه هيلتون على الناحية التانية من الشارع ..
صاحبنا اخد بعضه ودخل على هيلتون .. جرسون .. نعم .. عندك ايه قاله صدقنى يا سعادة البيه عندنا محمرات ومشمرات وسمك ورز ومكرونة وكل حاجة تطلبها هتلاقيها .. قاله طيب هاتلى من كل صنف طبق ادوق كده واستطعم .. نزله الاكل .. بقى ياكل ويمزمز ويقول كنت فين يا ابونا من زمان بس .. شبع صاحبنا وجه الحساب على حساب ابونا .. تحت امرك يا افندم .. فقام سال الجرسون مفيش حته الواحد ينام فيها هنا .. قاله فيه طبعا سيادتك الباب التانى الاستقبال هم هيساعدوك .
قام دخل على الاستقبال قالهم انا عاوز اوضة قالولوا فيه اوضة بسرير وفيه بسريرين وفيه جناح .. قالهم ايوة انا عاوز جناح .. المهم تعدى الايام وصاحبنا يشترى بدل ولبس ويطلع ينام فوق وينزل ياكل تحت وعايش حياته جميله خالص .. وجه فى مرة ونزل على مدير اللوكانده وقاله ملاقيش حد يكون بيبيع بيت .. فقاله فيه سعادتك رئيس المدينة بيبيع الفيلا بتاعته بس طالب فيها مبلغ كبير قوى .. فقاله كام يعنى قاله بيقول مليون قاله ياه بس كده هو فين الراجل ده ..
راح صاحبنا لرئيس المدينة وقاله انا عاوز اشترى الفيلا بتاعتك .. بس دى غاليه قوى .. كام يعنى .. مليون .. فقام صاحبنا قاله انا هديك مليون ونص وتدهنها وتوضبها كده واخدها على المفتاح .. طيب والفلوس على حساب ابونا .. تحت امرك يا افندم .. فقام سال رئيس المدينة طيب تعرف حد اجيب منه موبيليا .. قاله طبعا فيه شركات كتير قوى .
صاحبنا اخد بعضه وراح لشركة من الشركات دى وطلب 18 اوضة يتفصلو على المقاس من افخر انواع الخشب وباعلى تكلفة ممكنة . والحساب .. طبعا على حساب ابونا .. تحت امرك يا افندم .. سال صاحب شركة الموبيليا متعرفش حد يكون عنده بنته تكون محترمة وبت ناس وكويسة نجوزها .. قاله فيه يا افندم بنت القاضى .. بس طالب فيها مهر كتير قوى ..
راح صاحبنا للقاضى وشاف بنته لقاها بتاعه طالعه من وش القمر .. يعنى حاجة فوق الخيال زى ما يكون ربنا لسه مخلصها دلوقت . فقاله انا عاوز اتجوز بنتك .. قاله بس المهر .. كام يعنى .. قاله نص مليون قاله انا هديلك مليون وتلفها فى سلوفان كده وتجيبهالى .. طيب والفلوس .. على حساب ابونا .. تحت امرك يا افندم ..
تمر الايام ويتشغل صاحبنا وطبعا جاب خدم وحشم للسرايا بتاعته ومن كتر مشغولياته كتب على الباب مواعيد المقابلة من تسعة الى الثانية عشر صباحا ومن ستة الى تسعة مساءا فقط لا غير ..
ومرة كان فيه يوم شتا قوى وبرد قوى .. وكان ابونا نزل اليوم ده المدينة وقعد يسدد فى كل الفلوس اللى على صاحبنا .. سدد القهوة والهيلتون رئيس المدينة وشركة الموبيليا والقاضى وكل حاجة ومن كتر التعب فكر ابونا انه يروح يستريح عند مين ؟؟ عند ابنه بقى اللى هو سددله كل الكلام ده .راح ابونا لقى واحد واقف لابس جلابيه بيضا وطرطور احمر نوبى هو فقاله سيدك فوق ؟؟؟ فقاله ايه سيدى فوق .. قاله طيب اطلع قوله ابونا .. قالوا شوفى انا اقولك حاجة كويسة سيدى علشان يحبك انتى تلفى تلفى وتيجى الساعة ستة .. قاله انت بتقول ايه اطلع قول لسيدك ابونا تحت .. قاله انتى تعرفى انتى هتجيبيلى وجع دماغ انتى لفى لفى وتعالى الساعه ستة .. ابونا شخط فيه وقاله اطلع .
طلع الراجل خبط على سيده .. مين .. انا سيدى فيه واحد واقف تحت كل ما امشية ييجى يقف تانى اسمه ابونا ولازم عاوز يدخل لازم عاوز يدخل مش عارف اعمله ايه .. فرد صاحبنا وقاله لا ابونا ولا امنا قوله يلف يلف وييجى الساعه ستة .. نزل الراجل وقال لابونا انتى تعرفى انتى جيبتيلى صداعى انتى سيدى يقولك لفى لفى وتعالى الساعة ستة كان من الاول .. فابونا قاله سيدك قال كده .. قاله ايه .. قاله طيب وسع .. انتى تعملى ايه .. المهم ابونا زق الراجل ودخل فين سيدك قاله هنا نايم مع الست بتاعه .. ست مين وبت مين خبط . صاحبنا قال مين .. قاله ابونا .. اه ابونا !! .. فرد ابونا لا لا ابونا ولا امنا تعالى ودنك فين .. سحبه من ودنه ومشى بيه فى شوارع المدينة وخرج بيه عند الباب وقاله كام واحد دول قاله سته قاله وبيقولوا ايه قال بيقولوا الحق عليا .. قاله اقعد وابقى نمرة سبعه وقول الحق عليا ..
هذه القصة فى ذكرى ابونا المتنيح القمص بولس بولس راعى كنيسة مارجرجس بدمنهور والذى قام بالقاءها على مسامع الشعب الذى استنار قلبه ببهجة وحلول الروح القدس اسال منه ان يذكرنا جميعا فى صلواته امام عرش النعمه .. أمين
اذكرونى فى صلواتكم | |
|
fadysamergerges
المساهمات : 90
تاريخ التسجيل : 30/04/2008
| | موضوع: رد: *-*-*أنتى تلفى تلفى وتيجى بعد الساعة ستة*-*-* الخميس سبتمبر 18, 2008 6:28 am | |
| قصه حلوة جدا
واتعلمت حاجة كويسة منها ان احنا مننساش ربنا ساعة لما نكون مبسوطين او الحياة بدون مشاكل على الاقل
بجد ربنا يعوضك
بس ممكن سؤال
ممكن رقم ابونا
هههههههههههههههههههههههههههههههههههههههه | |
|
